Güllər halay qurub toy həvəslidir ,

Göy tala gəlinlik atlas dəstidir ,

Sanki qız evində paltarkəsdidir

Lalələr alduvaq , zanbaqlar qotaz ,

Bir dünya sevinclə gəlibdir bu yaz .

Düzülüb arx boyu saçlı söyüdlər ,

Arxda çırmanıblar dizinə qədər .

Elə bil qızlardır , su üçün gedir ,

Sular da qızlara edir işvə - naz ,

Bir dünya sevinclə gəlibdir bu yaz .

Ulduzlar göylərdə qızıl toxum tək ,

Bu yaz gecəsində açacaq çiçək .

Sanki , Ay bir bəydir , bulud - ağbirçək ,

Göylər qələbəlik , gecələr bəyaz ,

Bir dünya sevinclə gəlibdir bu yaz .

Sanki , ağacın da ruhu , canı var ,

Bahara hamilə qalıb ağaclar ,

Bir yaşıl budaqdan " doğulacaq" bar .

Cansız kötüklər də göyərib bir az ,

Bir dünya sevinclə gəlibdir bu yaz .

Bu yaz yağışları məlhəmdir , axı ,

Saralan çöllərin üzünə yağır ,

Nərgizin mürgülü gözünə yağır ,

Kaş ki , bu yağışdan ayıla Araz ,

Bir dünya sevinclə gəlibdir bu yaz .

11 . 03 .2026