Şövkət Zərin Horovlu. -  Aparır.

Ədəbiyyat 13:05 / 16.11.2026 Baxış sayı: 802

 

Gözüm dalda qala-qala

Karvanım düzəlib yola,

Kaş bir azca rüsxət ola

Ömür yaman baş aparır.

 

Gələn gəlir , gedən gəlmir,

Dünya öz vərdişindədir.

Ruhum özümdən öndədir,

Mənzilimə tuş aparır.

 

Yol uzaq ömür də gödək,

Ümiddən tutmuşam bərk-nərk.

Dolanıram bir xəyaltək,

Yuxu tutur, huş aparır.

 

Yalanlar özümü yordu,

Artdıqca dözümü yordu.

Gördüyüm gözümü yordu,

Qarasını yaş aparır.

 

Sərgərdandır ömür yolda,

Ürək kövrək , fikrim darda.

Baharım, hardasan , harda,

Məni döyüb qış aparır?

 

Mənə qalsa heç getmərəm,

Doğmaları tərk etmərəm.

Mən ta biçilmiş bir vərəm,

Yağmalayıb yaş aparır.