Əlizadə Nuri - Yorğunluq

Ədəbiyyat 20:01 / 16.11.2026 Baxış sayı: 673

 

Allah göydə deyilsə,

O göy kimin göyüdü?

Harda yetim dərd qalıb

Verin məni böyüdüm...

 

Gülə güllə atdılar,

Dik tutmuşdu başını.

Yağan yağışdı,yoxsa

Göy üzündə vurulmuş

 

Quşların göz yaşıdı?

Hər yanımı qan tutub-

Mən də belə adayam.

Bəlkə o bayquş desin-

Hansı xarabadayam?

Yuxumda yatan çiçək,

Öpüb oyatdım səni.

...Ölüm, məni bağışla

Bir az yubatdım səni.

Özümlə oynayıram,

Bəs hanı tay-tuşlarım?

Bu gün süfrə açmışam:-

Çağırın ac quşları...

Qolum özgə toyunda,

Ürəyim dost yasında.

Mən öləndə basdırın

Bir leylək yuvasında.

...Ölü balıqlar düşür,

Atdığım hər qırmağa.

Çox soyuqdu... gedirəm

Allaha sarılmağa.