Günəş güzgüsünü əlindən salıb,

Çiçəklər rəngini rəngindən alıb.

Şəhərə çıxmısan, daş heykəllər də

Arxanca boylana - boylana qalıb,-

Hara aparırsan

bu gözəlliyi?

Heyrətdən bir kəlmə danışan da yox,

Bu qəfil sükütla barışan da yox,

Kəsib qabağını soruşan da yox

-Hara aparırsan

bu gözəlliyi?

Şəhərə aydınlıq üzündən düşüb,

Sığallı xanımlar nazından düşüb,

Yanıqlı - yanıqlı bağır kişilər,

Çoxunun arvadı gözündən düşüb -

Hara aparırsan

bu gözəlliyi?

Bu sevda başımdan sovuşan deyil,

Bu gözlər üzündən yığışan deyil,

Onsuz da heç yana sığışan deyil, -

Hara aparırsan

bu gözəlliyi?