"Sözlərdəki sən"dən

Yuxularımda tez-tez

Meh-yarpaq pıçıltısı,

Ayağım altındakı

Ot-ələf xışıltısı

Salır səni yadıma.

Yatmışamı, oyağammı,

Hardan bilim bunu mən?

Tökülür yatağıma

Bumbuz damlalar dən-dən

İsinməkçün oduma.

Soyutma, gəl hücrəmi,

Getmə uzağa, zalım.

Məni simə qəlbindən,

Yanımda ol, güc alım.

Bilim yetdin dadıma.

Nə vaxtadək de, sənsiz,

Yalqız, tənha yaşayım?

Ağrını, əzabları

təkcə necə daşıyım,

dözərək inadına?!

İnsaf et, alma məndən,

Gecəmi, gündüzümü.

Yaz qəlbinə, unutma,

Sadiq ol şərəfimə, adıma.

Soldurma çiçəkləri,

Əzizlə soyadımı,

Rəng qat, gəl həyatıma.