Ağaevli Əli Hacı -Durum,bir udum su içim

Ədəbiyyat 11:13 / 23.04.2026 Baxış sayı: 249

 

Durum,bir udum su içim,

Boğazımdan keçsin hava !

Qara günə ağ geyinim,

Günümdən su içsin hava !

 

Ver əlimin işığıyam,

Al əlimin işığı yox !

Dərd ilə doğma kimiyəm,

Sevinclə tanışlığım yox !

 

Külək kimi qapı-qapı,

Əsdim,açılmır qapılar !

Xəstə kimi Haqq gəzirəm,

O,da ki,çətin tapıla !

 

Kəfən cırdım hər anıma,

Ölüb-dirilmək bu imiş !

Ömrümü kor elədilər,

Hər şeyi gördü bu ölmüş !

 

Ağrımı çəkdim sahilə,

Bağrımı yardım Tanrıya !

Çox sirr apardım Tanrıya,

Bəlkə,məni O, tanıya !