BİR GÜNAHDAN MİNİ TÖRƏR

Dönməzmi dövran deyirsən;

en yuxarı, qalx aşağı,

Kəsilməzmi qapılardan

qəmin, kədərin ayağı...

Dərindədi dərd dağları;

bu qabaca, sərt dağları

Yıxmazmı,

sinə ahları

qopmazma tufansayağı?

Biri yer, biri baş əkər,

candakı bu nə səksəkə;

Birdən-birə yata, çökə

qorxasan ömrün dayağı.

Qəlb evinə işıq düşməz,

gün altında dolan, ha gəz.

Gəz, özünə bir yuva gəz;

gör kim kimə qəm ortağı.

Küllük eşərsən kül çıxar,

indi gözlə ki, gün çıxa.

Bayıra bir burun çıxar,

çiynində bitər bəy tağı...

Bir günahdan mini törər-

beşər-beşər, birər-birər.

Çəkib çıxarar hansı əl

köksündən paslı bıçağı?

Göz açıb görürsən yuxu;

nədir bu göz açıqlığı.

Sağ-sol gedən saçar qorxu;

bilinməz ki, solu, sağı.

Hər sayılan saydan deyil,

nə deyirsən aydın deyil.

Hamı bir nuzam istəyir,

yalan-dolan çoxdu, axı.

Kimə bəlli harda nə var,

çoxu ovucunu yalar.

Bir ucdan artar, çoxalar

qəlblərin də his-pasağı...