HEÇ OLMASA YAD KİMİ - Coşqun Xəliloğlu

Ədəbiyyat 20:37 / 08.09.2026 Baxış sayı: 791

 

Dolmuşam bulud kimi,

Köklənmişəm ud kimi,

Yaşayıram ömrümü

Sonuncu umud kimi.

Su töküblər üstümə,

Hey baxırlar tüstümə,

Qızınan yox istimə,

Kül altında od kimi.

Dərddən döndüm ozana,

Şükürlər bəxt yazana,

Tuş olmuşam xəzana-

Vaxtsız solmuş ot kimi.

Dost-tanış düşüb iraq,

Dərdlərim varaq-varaq,

Məni edən yox soraq,

Heç olmasa yad kimi...