Xatirə Rəhimbəyli - Gözəl bir yaz gecəsi
Ədəbiyyat
11:00 / 23.09.2026
Baxış sayı: 86
Gözəl bir yaz gecəsi
küləklər şərqə əsir.
Sənə gəlib çatdımı
qəlbimin incik səsi?!
Xoşmu könlün havası?
Yağırmı yaz yağışı?
Qəmli misralarımı
oxşayırmı baxışın.
Gəzirəmmi röyanın
güllü yamaclarında?
Kəpənək barmaqların
uçurmu saçlarımda?
Qaçıb küskün xəyalım
qısıldımı yuxuna?
Ah, yoxsa duamı da
buraxmırsan yaxına?
Gözəl bir yaz gecəsi
küləklər şərqə əsir.
Sənə gəlib çatdımı
qəlbimin incik səsi?!
