Rəfail Tağızadə -Şuşa zəfəri
Ədəbiyyat
18:11 / 09.11.2026
Baxış sayı: 294
Sevinclərə sevinc qatan o günün,
Qəhqəhəsi atəşlərin selində.
Bayrağımda öpüşlərin bal izi
Dalğalanır zirvələrin əlində.
Kim sevinməz qələbənin dadına?
Arzularım, istəklərim canında.
Həsrətimiz boz rəngini dəyişdi
Oğulların, ərənlərin qanında.
Zəfərlərə zəfər qatan igidin
Alqışına milyon əllər əl çalır.
Səda gəzən obaların, ellərin
Torpağı da sevinclərdən qol açır.
Bayraqdakı dalğaların səsinə
Səs verəni içdən gələn sədadı.
Bu tarixin həm möhürü, nidası -
Zəfərlərin zirvə adı Şuşadı!
