Elşən Əzim : - Mən o zaman...

Ədəbiyyat 06:48 / 08.06.2025 Baxış sayı: 1256

Mən o zaman ölmüş idim

Qabığından çıxıb- gedib

təzə qabıq geyinməyən

İlan kimi

 

Yaşayırdım öz dilimdə

Anam mənə arzu tutan

Söz dilində

Yaşayırdım

Yalan kimi.

 

Sən mənə qalmadın axı

Mən zamanın bəri tayı,

Sən o tayı

Zaman keçdi aramızdan

Mən bir ilan qabığıydım

Qabıq kimi çürüyürdüm

Sən dolanıb ilan kimi

 

Sabahlara sürünürdün .

Bu dünyaya yüz ad qoyduq

Qabıq dünya, ilan dünya.

Bu dünyanın bir adı var

Yalan dünya, Yalan dünya.