Xəyalə  Sevil - Ürəyimdə bir müsiqi səslənir

Ədəbiyyat 08:45 / 11.11.2026 Baxış sayı: 499

Ürəyimdə bir müsiqi səslənir,

Sözləri məndəndi, avazı səndən.

Yaman üşüyürəm bu son zamanlar,

Bir azı qışdandı, bir azı səndən.

 

Gəlsəm, yolum çatar, çağırsam, səsim,

Gəlmirəm, dinmirəm- gör nə deyirəm.

Uzaqdan-uzağa sevirəm səni,

Yaxından-yaxına qəribsəyirəm.

 

Nə qədərəm ürəyində bəs sənin?

Boydan-boya, endən-enə ölç, görüm.

Qəliz işdi mənim səndən keçməyim,

Yol yaxınkən özün məndən keç, görüm.