Danışsan, elə danış,

Dediyin sözə güvən.

Bir iş görsən Allaha -

Xaliqə-“Düz”ə güvən.

Dərindən düşün, anla,

Qanı yumazlar qanla.

Nə dost olma nadanla,

Nə də hər kəsə güvən.

Gəl, güldürmə aləmi,

Yazmaq elə-beləmi?

Ələ alsan qələmi,

Qəlbində közə güvən.

Dağ dərdi vardır dağın,

Dağmı, hər dağ sandığın?

Halalca qazandığın,

Çörəyə-duza güvən.

Bir bax, yolu seçəndə,

Boylan, bərəyə-bəndə

Azsan dumanda, çəndə

Cığıra, izə güvən.

Coşqun, həyatı anla,

Yarışdayıq zamanla,

Ucal Azərbaycanla,

Kökə-Oğuza güvən.

02.08.2025