Bir gündə hər saata

düşdü iki, üç şəhid...

...Boynumuzun ardında

Var hey bir qılınc, şəhid...

Qurbanlığı sandın yol;

Yaşın cəmi iki on...

Doğma yurd...dedin ilk o,

Başqa hər şey puç, şəhid...

Anana ruzu- qəmin,

Atana ruzu- qəmin;

Getməz bu azuqənin

Dadı, tamı heç, şəhid...

Bu cür olmalı dedin--

Vətən qalmalı dedin;

Hamı qalxmalı,-dedin,

Nə tezdi, nə gec, şəhid?

Qatlamadın diz, yumdun,

Gördük, axı, biz, yumdun;

Torpaq üstdə göz yumdun,

Torpaq altda aç, şəhid!

Ay elə gəldi gedər,

Gün belə gəldi gedər;

Ay bizə ağır kədər,

Ay bizə güvənc şəhid!