Aysel   Xanlarqizi Səfərli

Ədəbiyyat 09:39 / 09.07.2025 Baxış sayı: 907

Otağın dörd bir küncünə,

Boşaldırsan hey təkliyi.

Allahın gözündən uzaq,

Ölümün boz yüksəkliyi...

Qalxırsan, nəfəsi gedir.

 

Hər an mesaj qutusunda,

Göz yaşın bir xoş söz gəzir.

Bu necə ömürdü axı,

Gələn üzür, gedən əzir,

Hər şeydən həvəsin gedir...

 

Yolların canı öyrəşib,

Ağrısına hər vidanın.

Canı çıxsın darıxmağın,

Qınananda da adamın

Özündən zəhləsi gedir.

 

İçimdə boş bir quraqlıq,

Çölümdə leysan yağışı.

Ruhumdakı sancıların

Sabaha kədər doğuşu

Ta Allaha səsi gedir...

Yaxınkən uzaq olursan,

Adamın nəfəsi gedir...