Axtarış vermişəm, araşdırmışam

Dünəni bu günə yaraşdırmışam!..

Hələ də, ağlmda, qarışdırmışam -

Səni unutduğum Gün, hansı gündü?!

Gündüz dörd göz ilə gəzib, baxıram

Eynəyin üstündən eynək taxıram!

Həftənin sonuna gəlib çıxıram -

Səni unutduğum Gün, hansı gündü?!

Gecə səhərəcən yazıb silirəm,

Nəyi bilmirəm mən, nəyi bilirəm?!

Yenə o , sualın üstə gəlirəm -

Səni unutduğum Gün, hansı gündü?!

Təqvimi min dəfə ələyib dən, dən

Düzürəm anları boy sıraya mən!..

Nə təxmin edirəm, eh..nə də ki, zənn -

Səni unutduğum Gün, hansı gündü?!

Duan varlığımdan, adın dilimdən -

Düşmür, gələn budur, indi əlimdən!..

Suala cavab ver, varmı, bilim mən -

Səni unutduğum gün , hansı GÜNDÜ!