Əlizadə Nuri : - Kədər, gündüz gəl bizə...

Kədər, gündüz gəl bizə...
Hara qoyum bu qəmi?
Əlim gəlmir atmağa.
Hansı yalanı seçim,
Özümü aldatmağa?
Ümidi şikəstlərin,
Ürəyi şikəstədi.
O ay niyə saralıb
Yoxsa o da xəstədi?!
Günəş, gəl şəklimi çək,
Sonra yaz arxasını.
...Bir az gözlə, bağlayım
Dərdimin yaxasını...
İçim də çiliklənib,
Sınan bir cam kimiyəm.
Özü öz məzarını
Qazan adam kimiyəm...
Ver əlini, nə olsun
Qara qulam, ilahi?
Quruda üzsəm də mən,
Boğuluram, ilahi...
...Yolu keçmək istədim,
Gördüm yolda hasarsan.
Kədər, gündüz gəl bizə
Axşam yolu azarsan...
...Hara qoyum bu qəmi?
Əlim gəlmir atmağa.
Hansı yalanı seçim,
Özümü aldatmağa?..