Ayaz Arabaçı : - Əlimdə bir şəkil var...

Ədəbiyyat 10:50 / 06.03.2023 Baxış sayı: 14548

ürəyimi oynadır,

hər baxanda yerindən,

qoparmışam-üzmüşəm,

xatirə dəftərindən.

gözlərindən öpürəm,

köks ötürüb dərindən,

əlimdə bir şəkil var..

 

məni isti yuvamdan

min dəfə perikdirib..

könlümü sağdan-sola,

soldan-sağa əkdirib..

o bu şəkli bir zaman

mənə görə çəkdirib,

əlimdə bir şəkil var.

 

baxıram,baxa-baxa,

əriyirəm-axıram.

ən gözəl çiçəkləri

saçlarına taxıram.

nəfəsim çatmayanda,

o şəkilə baxıram.

əlimdə bir şəkil var.

 

yaxşı ki,heç olmasa,

ondan bu şəkil qalıb.

sanmasın ki, küləklər,

onu əlimdən alıb,

bu şəkil neçə dəfə,

məni ölümdən alıb,

əlimdə bir şəkil var.

 

uçuram xəyalıyla,

göyün yeddi qatında.

xilas yelkəni olur,

göz yaşında batanda.

yastığımın altına,

gizləyirəm yatanda,

əlimdə bir şəkil var...