60 yaşı tamam olan ŞAİRİMİZİ  ürəkdən təbrik edir, Ona can sağlığı  və bir-birindən gözəl  ŞEİRLƏRLƏ  biz  oxucuları SEVİNDİRMƏYİ, öz  könül  PIÇILTILARINI  ŞEİRLƏRƏ çevirməyi arzu edirik! 

                                                                         Yenises.az

***

Məndən başqa hamıya

canın elə yanır ki…

Halına yandıqların

səni bir yol anır ki?!

Axı,öyrəşməmişəm

mən “ah”-uf” eləməyə.

Elə söz var,qıymıram

onu sənə deməyə.

Mən çoxdan alışmışam

dərdi tək daşımağa.

Göz yaşımı qəlbimə

axıdım yaşamağa.

Eh…səni aldatmasın

üzümdəki təbəssüm.

Hönkürüb ağlayarsan

görünsə birdən üzüm…

Məni belə qoyub get!

de ki,eh,sən də nə var?

Qoy dərdi tək aparım,

sonra sənə yük olar…

***

Özünü aldadarsan

“unutdum” deyə hər gün.

O sevgini yaşadar

hər addımı bu ömrün.

Söndürüb göz yaşıyla

ürəyinin odunu.

Hamıdan gizlədərsən

o zalımın adını.

Bəlkə də səndən ötrü

təsəllidi darıxmaq.

Axı,bilmirsən hələ

necə olur unutmaq…

***

Yay bitdi…

Hamı getdi…

Dəniz qaldı tənha,tək.

Sahildə tənha qayıq,

bir də yetim yelləncək.

Sular ayaq izini

yuyub aparıb çoxdan.

Xatirələr yaxında,

ancaq sən uzaqdasan

Gündüzlər elə səssiz,

gecələr elə qərib.

Bəlkə elə bu gecə

dəniz yuxuna girib…

Günəş saralıb-solub

yolunu gözləməkdən.

İndi külək yellənir

kimsəsiz yelləncəkdə…

Sənsiz ürək sinəmdə

boş qalan bir qutudu.

Tənha qayıq elə bil

bir eşqin tabutudu.

Dizini qucaqlayıb

bilirəm,evdə təksən.

Məni dəfn eləməyə

nə zaman gələcəksən.

***

Bir sənsən bu dünyada,

bir də təkcə mən varam.

Hər gün gözünə baxsam,

yenə səndən doymaram.

Bizdən başqa kimsə yox

eşq adlı bu səhrada.

Ötənləri unutduq,

düşməz bir kimsə yada…

Əllərinin istisi

ürəyimi isidər.

Elə bir yerdəyik ki

nə sevinc var,nə kədər…

Nə gözəldi bir ömrü

gözlərindən oxumaq!

Burda darıxmağa da

vaxtımız yoxdu ancaq.

Əriyib zaman itib

içində sonsuzluğun.

Yenidən doğulmuşuq

bətnində bu yoxluğun…

***

Mən hamının unutduğu

bir uçuq komadan betər.

Zalım,sənin yollarına

göz dikmişəm axşam-səhər.

Barı bir yol ayaq saxla,

bircə dəfə qanrılıb bax!

Bir də gördün daş üstündə

heç daşım da qalmayacaq.

Bircə isti baxışınla

suya dönər bu buz, bu qar.

Ürəyimin oyuğundan

bənövşələr baş qaldırar.

Nə olacaq,aldat məni,

bircə dəfə yalan danış.

Bəlkə elə ömrümüzü

uzadacaq bu aldanış.

Eh… nə deyim sənə daha,

bağışla yoldan elədim.

Gərək dilim quruyaydı,

bunu sənə niyə dedim?!

***

Dedin ki,keçib gedər…

keçib getmədi ancaq.

Bu sevdanın əlində

könlüm olub oyuncaq.

Ürəyimi içindən

bir ağrı oyur elə.

Nə biryolluq öldürür,

nə rahat qoyur elə.

Sən də arzuna çatdın,

əllərinə xına yax!

Məni külə döndərər

səni isidən ocaq…

İtirər mənasını

bir gün yersiz inadın.

Sonuncu nəfəs kimi

dilimdən düşər adın.

Bəlkə elə unutdun

bir də düşmədim yada.

Eh…bu da bir ömürdü,

bəlkə getdim…əlvida…

***

Saxlamaq istəsən də

çıxıb gedəcək hamı.

indi tənha qarşıla

sən bu qərib axşamı…

Boğazdan yuxarıymış

xoş sözlər,xoş qılıqlar.

Qapını külək döyər,

ya da ki ayrılıqlar.

Bir az özünə ağla,

sonra kirit özünü.

yaddaşını varaqla,

bir azca yum gözünü…

Görsən ki yuxun qaçıb

kədəri söhbətə tut.

söykən bir xatirəyə,

sonra özünü unut…

***

Bilirsən səndən ötrü

Nələr çəkir bu ürək…

A zalım,bircə dəfə

Çəkdiyimi sən də çək,

Gör darıxmaq necədi…

Baxıb mən gələn yola.

Köksünü ötür,ağla…

Qucaqla dizlərini,

Bir azca otur, ağla…

Gör darıxmaq necədi…

Yarpaq kimi titrə,əs,

Hər qapı döyüləndə.

Ürəyini tutub qaç

Hər adım deyiləndə,

Gör darıxmaq necədi…

Diksin,atıl yerindən

Hər telefon zənginə,

Gör nələr çəkdirmisən

Bu günəcən sən mənə…

Gör darıxmaq necədi…

Dur,boylan pəncərədən,

Tez-tez bax da saata.

Hərdən ümidini üz,

Nifrət elə həyata,

Gör darıxmaq necədi…

Unut getdiyin yeri,

Hərdən unut adını.

Ancaq unutma heç vaxt

Darıxmağın dadını…

Gör darıxmaq necədi!

***

Birini qoyub gedirsən,

dönürsən ki çıxıb gedib.

Özünə ev tikəsiydi,

öz evini yıxıb,gedib…

Baxt bir gülər,ildə,ayda…

onsuz ömür çıxıb yaydan.

son ümidi qoydum çayda,

gəlib gördüm axıb gedib…

Ay üzündə halə qandı,

Sinəmdəki nalə-qandı.

Deyim,niyə lalə qandı,

yar qəlbini sıxıb gedib.

***

Bəlkə yoxdu dünyada

mənimtək tənha adam.

Mən səssizcə əriyib

öz içinə axan şam…

Neylim,mən də beləyəm,

yovuşmuram heç kimə.

Ürəyimi yandırıb

dərdi qoymuşam dəmə.

Bir sevdanın odundan

alışmışam gizlicə.

Eh…sonra da özümlə

danışmışam gizlicə.

Yox üzümü söykəyib

ağlamağa bir divar.

Səndən başqa dünyada

axı,mənim kimim var…