Şakir Xanhüseyn : - UŞAQLAR üçün

Ədəbiyyat 08:26 / 02.06.2025 Baxış sayı: 1412

 

Uşaqlar üçün

açılsın qanad-qanad,

sübh-sübh qucaqlar,

qollar üfüqboyu uzansın, yahu,

köz-köz nəğmələnsin

bütün ocaqlar

uşaqlar üçün...

Bir zəmi edək bir ovuc dəni,

gözlərindən səadət oxunsun,

razı olmayaq üzlərindəki

gülüşə bir toz qonsun,

Çatsın sonu acı göz yaşların da...

Hər an şirin bir xatirə

yuvalansın yaddaşlarında,

yuyaq , par-par parıldadaq

hər şeyi,

bu yeri, göyü,

Nə bir gün çox yaşayaq deyə,

nə artıq vardan ötrü;

elə özümüzü də qoruyaq

Uşaqlardan ötrü!..