Bu gün Azərbaycanın çox dəyərli şairi Vaqif Bayatlı Odərin doğum günüdür. Əziz şairimizi təbrik edirik!

Vaqif Bayatlı Odərə

Bu köhnə şəhərin qaranlıq gecələrində,

bu köhnə şəhərin qaranlıq küçələrində,

köhnə küçə fənərlərinin süzülən işığında

özünü tənhalıq qoynuna almış

yalqız bir şair kölgəsi tanış...

Tanınar şairlər

doğma, yad küçələrdə,

tanınar şairlər bu yer üzündə...

Tanınar şairlər özündən qabaq,

əlindən, üzündən, gözündən qabaq.

Kölgəsindən tanınan şairlər.

Küləklər tanıyar, küçə tanıyar,

bu zülmət-qaranlıq gecə tanıyar,

könlümdə, könlündə bir hiss tanıyar,

mələklər tanıyar, iblis tanıyar.

Gecənin qaranlıq süst dodaqları

sümürər şairi səhərə kimi,

əriyər, yox olar şair hər gecə,

içilər, biçilər şair hər gecə,

böyüyər, kiçilər şair hər gecə.

Təzədən doğulub aparar səni,

qoparar gecədən qoparar səni,

tanınar şairlər özündən qabaq,

əlindən, üzündən, gözündən qabaq.

Kölgəsindən tanınan şairlər.

Tanınar şairlər bu yer üzündə,

bu qara gecədə, bir yad küçədə.

İzdiham içində, dalğa içində

seçilə bilirsə şair kölgəsi

lap elə bu saat, lap elə bu an,

lap elə təzə ay doğana kimi,

sevincim özünü boğana kimi

bir şeir yazmağa dəyər bu gecə.