QARA  YAĞIŞ

Odla ki, oynayır bu qədər  məmləkətlər,

Tüstülər qıvrıla-qıvrıla üzü göyə qalxar.

Xəritəyə düşməyən

İrili-xırdalı tüstü çayları,

Üzü yuxarı  axar...

Axar bu tüstü çayları

Xəritəyə düşməyən

Nəhəng Tüstü okeanına...

Hopar bir ucdan

Yerə bərəkət gətirən

Buludların canına...

Buludlar da nəfəs alar

Ağır-ağır...

Hələ sinoptiklər bir yana,

Heç yağışların  özləri də bilməz

Hara düşür,

Hara yağır...

Yağar qara yağışlar,

Qara günə qoyar təbiəti...

Əsrimiz qalar

Bu dünyaya yas tuta-tuta...

Qara yağışdan

Yer dönər özü boyda bir qara tabuta...

Olmaz üstündə bir ağlayanı da,

Bir saç yolanı da!..

Tapılmaz

 Bir  matəm  marşı çalanı da!..

                                              2024

GÖYƏRÇİNLƏR

Havaya qalxın, uçun, uçun göyərçinlər,

Qanadlarınızı geniş açın göyərçinlər.

Alnınıza  SÜLH  yazılıb,

Bilir  bunu bütün bəşər;

Gəlib qarşı-qarşıya dayanıb

Bu gün  Xeyirlə Şər...

Uçun!.. Uçun!..

Bir dəstəniz qonsun

 Kremlin divarlarına,

Bir dəstəniz də

Ağ evin dəmir barmaqlqlarına...

Qanadlarınızı yelləyə-yelləyə

Elçi düşün sülhdən ötrü.

(Bir az da qanadlı olun,-

Ləngiməyin vaxt ötürüb!..)

Hardan alım indi axı Pikassonu,

Əlində fırça

Meydana atıla.

Bu dünyamızda

 Sizin sayınlzı bir az da artra!..

Havaya qalxın, uçun, uçun göyərçinlər,

Qanadlarınızı geniş açın göyərçinlər!..

                                      2024

 

  QARIŞQA YUVALARI

Qarışqa  yuvaları böyür-böyürə,

Qırtək qara-qara qarışqaların

Hərəsi öz iş-gücündə..,

Əmin-arxayınca yaşayırlar,

Dünyanın hər bir küncündə...

Allah yaratdığı

 Bu qarışqalar

Başını aşağı salıb işləyir,

Gəlmir bir-biriylə kəllə-kəlləyə...

Biri yedəkləmir  başqa birini,

Çəkmir   fitnə-felə,

 Çəkmir  kələyə...

Hər biri də bilir öz iş-gücünü,

Qışı gözü altda alıb işləyir...

Biri apardığı dənə-

Bir baxın,

Burda başqasının nəfsi düşməyir...

Qarışqa yuvaları

 Bu təbiətin

 Həyat dərsliyidir bəşərə bəlkə...

Burda yuvaların hər biri də,

Bir məmləkət...

Bir ölkə...

Burda nə embarqo qoyulur,

Nə də nota  verilir,

Yuvalar  hərəsi də öz işindədir.

Hərəsi də  öz yolunu-izini  yaxşı bilir...

Kaş ki, qan axıdan prezidentlər,

Görə bu qarışqa yuvalarını...

Bir az dərs alalar bu təbiətdən,

Bir az dəyişələr havalarını...

                                25.10.2024

 

KƏPƏNƏKLƏRİN ÖMRÜ

 

Sizin taleyiniz elə gətirib,

Gül-çiçəkli çəmənlərə bağlısız.

Dünyaya  gələn gündən,

Yaz ünvanlı,

Yaz soraqlısız...

Ömrünüz-gününüz

Bu dünyada bir ay çəkər, ya çəkməz;

Yaşayarsız gözəlliklər içində...

Yaxasına qonduğunuz

Çiçəklərin  hər biri də

Bir görkəmdə, bir donda, bir biçimdə...

Doxsan-yüz il yaşayan var...

Gözəlliklər qoynunda

Tapanmayıb özünü...

Belələri bircə kərə

Gözəlliyin görənməyib üzünü...

Doxsan-yüz il yaşayan var...

Gözəlliyin qapısından  girməyib.

Sizin bu bir ayda gördüyünüzü,

Ömrü boyu görməyib!..

                                      2024

 

ANAKONDALAR

Nəhəng anakonda ilanları,

Yaşayır  Amazonka sahillərində...

Bəzən suya baş  vurur,

Ov axtarır dayazda, dərində...

Udur balıqları...

Cəngəlliklərdə də var-gəl eləyir;

Nə ov tutsa buraxmır,

Dişlərini  də  salmır işə,-

Sığıya-sığıya udur,

Mədəsində həll eləyir.

Udur...udur ovunu,

Ağına-bozuna da baxmır...

...Bu anakondalar daha

Yayılıb  neçə-neçə  məmləkətə...

Özlərinə məxsus menyu tuturlar;

Meyil salmırlar balığa,

Başqa-başqa ova ...

Hərisliklə  var-dövlət,

Mal-mülk udurlar...

                      29.10.2024

 

      MƏNDƏN  BİR AĞ ATLI OĞLAN  ÇIXMADI...

         Eşidildi  qara zyrnanın səsi,

Oldum həsrətimin, oldim əsiri...

Bununla da  çökdü ilk eşqin qəsri...

Bir də hörülmədi,

Bir də qalxmadı...

 

O qızın yanağı oda bələndi,

 İçində nə çəkdi, kim nə biləndi...

Gözlərindən  yağış necə  ələndi,

Axı göy dinmədi, şimşək çaxmadı...

 

Ayağım yığıldı daha bulaqdan,

Eşqim uzaq düşdü  gözdən, qulaqdan..

         Boylana-boylana qaldım qıraqda,

Qismətim üzümə dönüb baxmadı.

 

Özümü vursam da oda, közə mən,

Dedilər gözləmə, getdi gözləmən...

Gətirdim eşqimi yoxsa gözə mən,

Məndən bir ağ atlı oğlan çıxmadı!?

                       2024

    GÜL-ÇİÇƏK DƏRMƏYİ YADIRĞAMIŞAM

 Aylar, illər ötüb ömrümdən, ürək,

 Tutmazsan sevgidən bir də dən, ürək!

 Alıb yaddaşımı duman-çən, ürək,

 Bilmirəm səhərdir, yoxsa ki axşam;

 Gül-çiçək dərməyi yadırğamışam.

 

Günəşlə qol-boyun qayıdıb bahar,

Çölləri-düzləri ayıldıb bahar...

Ayrılıb... sevgimdən ayrıdır bahar,

Dönmüşəm boranda, qarda qalmışa...

Gül-çiçək dərməyi yadırğamışam.

 

Sərt cığırlar məni bərk yanısa da,

Ömrü-günü ölçür əlim əsada...

Gül-çıçək çəməndə vağanısa da,

Taleyin işinə necə qarışam,

Gül-çiçək dərməyi yadırğamışam.

                                                            2024

 

        YAZAĞZI BİR  ETÜD                

 Gəlib düşsə gül-çiçəkli yaz yada,

Bir yarpaq da umma  quru səhradan...

 Vaxt öldürmə, balıq gəzmə dəryada,

Sən yön çevir, yağış yağan səmtə get.

 

Buludları qoy göy üzü kişləsin,

Dəli şimşək şahə qalxsın, kişnəsin.

Yaz yağışı iliyinə işləsin,

Yavaş-yavaş günəş doğan səmtə get.

 

Nəfəsini  dər yoxuşda bir hovur,

Boş qalmasın hisslərinin tilovu...

Onda bax gör sinən necə söz ovur,

Təbin çaytək coşub axan səmtə get!..

Sən yön çevir, yağış yağan səmtə get!..

                                     02.10.2024

 

                   DAHA

        

Zənnim  ay-ay, il-il qəddimi əyir,

Bilə  də  bilmirəm nədir istəyi...

Huşumun  mənimlə arası dəyir,

Deyir ki, başını get girlə daha.

 

Şeirimdən bir həsrət boylanıb-baxır,

Tüstüsü hələ də fikrimdən qalxır...

Söz çömçəm əlimdən  sürüşüb  çıxır,

Başımı qatıram kəfgirlə daha.

 

Dönürəm bir sönmüş ocaq yerinə,

Qəlbimi açıram qucaq yerinə...

Zaman məni qoyur uşaq yerinə,

Ovundurur  "əkil-bəkil"lə   daha.

 

Hər kəlməm yozulur hey  ora-bura,

Kimiyə ağ gəlir, kimiyə qara...

Üzümü tuturam cansız divara,

Dinib-danışıram şəkillə daha.

                                 30.10. 2024

 

NEYLƏSİN

Əgər bəxtin ensə üzü aşağı,

Arxasınca sən ha atıl, ha şığı...

Taleyinin haqdan sönsə işığı,

Buna şam neyləsin, çıraq neyləsin?

 

Acgöz olan varı, yoxu seçməsə,

Əməlini yüz  yol ölçüb-biçməsə,

Boğazından halal tikə keçməsə,

Axı diş neyləsin. damaq neyləsin?

 

Eləsi var gəzər kişi  sayağı,

Himcimlədi  qaşı, gözü, qulağı...

Qeyrətsiz  kəs yerə vursa papağı,

Papaqçı neyləsin, papaq neyləsin?

 

Qızıldan  da qoysan əgər baş tacı,

Yaxşılıqdır yenə onun əlacı...

Gövdəsindən  tutub kəssən ağacı,

Yarpaq hara qaçsın, budaq neyləsin?

 

Dünya çox qarışıb,sən ay ürək, döz,

Qurumuş bir ağac heç tutarmı göz...

İçindən gəlmirsə beşcə kəlmə söz,

Buna  yazıq qələm, varaq neyləsin?

 

Əlioğlu,haqqı əl-əl axtarar,

Yollar yorar ,orman keçər, çay yarar...

Əgər əcəl səni çəkib aparar,

Üstündə gəzdiyin ayaq neyləsin!?

                                           2024

 

KEÇMƏMIŞƏM KEÇDİYİNİZ KÖRPÜDƏN

 

 (..."Öyüd-nəsihət" verən bəzi məddahlara üç-dörd kəlmə)

 

Acqarına durub   Aya hürənlər,

Bircə anda minbir dona girənlər...

Ömrü-günü yaltaqlıqla hörənlər,

Hörgünüzü  hələ gendən seçmişəm.

.

Azalanda ağzınızın yalı da,

Azmısınız yolunuzu yarıda...

Çox ox atıb gizləmisiz yayı da,

Sınamışam, bunu ölçüb-biçmişəm.

 

Qarnınızı siz köpürdə-köpürdə,

Dərs almısız ilan yeyən kirpidən...

Keçməmişəm keçdiyiniz körpüdən,

Cumub  iti axan çaydan keçmişəm...

                      04.10.2024