Əbülfət MƏDƏTOĞLU : - BU ÜRƏK
Yenə havalanıb, almır eyninə -
Yatmır ipə- sapa, yatmır, bu ürək...
Baş vurur ağrının dərinliyinə -
Hələ ki, boğulmur, batmır , bu ürək...
Şeh yoxdu, kirpiklər bəs niyə yaşdı?!
Çox çəpər tapdadı, çox bərə aşdı...
Ovcunu tərlədən bir qara daşdı -
Gəzdirir içində - atmır, bu ürək...
Kədərin xəmiri hazır kündədi,
Ümid əl çatmazdı, xeyli öndədi...
Görün bu Əbülfət , hansı gündədi -
Onun harayına çatmır, bu ürək!