XƏBƏR LENTİ
01 İyul 2022
30 İyun 2022
29 İyun 2022



Poetik inci - Göyərçin KƏRİMİ
Ədəbiyyat 22:41 / 11.05.2022

     

                                       Poetik incilər sərrafı, söz xridarı,

                                       duyğular müəllifi, böyük şair

                                       Ramiz Qusarçaylıya xitabən

 

Uca zirvələrin uca yerində

Ruhum qərar tutub son qismət kimi.

Bilirəm, vaxt gələr, günün birində

Açılar bəxtimin ulduz tilsimi.

 

Məni də anlayan tapılar yəqin,

Dünyanın ən qoca gənci deyərlər.

Naqis ürəklərdə yurd salmasa kin,

Şeirimə poetik inci deyərlər.

 

Buluda bənzərəm, amma yağmaram,

Hissimi göstərmək xoşuma gəlməz.

Hayanda ilham var, şeir var, varam!

Şairlər meydana boşuna gəlməz.

 

Sularda qərq olan söz gəmisiyəm,

Küləklər sahilə çıxara bilər.

Zehnin unudulmuş köhnə ismiyəm,

Zamandan əvvəl də yadıma gələr.

 

Yadıma gələr ki, axşam düşəndə,

Günəşdən küsərdim batdığı üçün.

Istərdim yetirsin vəslə məni də,

Nəfəs candan ayrı düşməsin bir gün.

 

Düşsə də, qəlbinin uzaqlarında,

Hər kəs ilk sətirdən başlasın məni.

Bir bənd şeir olum dodaqlarında,

Bahar fəsil-fəsil yaşasın məni.

 

                            12 may, 2021


10302 oxunub

InvestAZ