Milli Məclisin  Mədəniyyət Komitəsinin sədri Qənirə Paşayevanın təşəbbüsü ilə noyabrın 27-də Xalq şairi Zəlimxan Yaqubun yenicə nəşr olunmuş "Turkun taleyi" adlı kitabının Ankarada ilk təqdimat mərasimi keçirilib. "Türk Ocaqları" Baş Qərargahında bas tutan təqdimatda Qǝnirǝ Paşayevanın başçılıq etdiyi nümayəndə heyəti iştirak edib.

Tədbirdə iştirak etmiş Əməkdar mədəniyyət işçisi, Zəlimxan Yaqub ədəbi irsinin tədqiqatçısı Musa Nəbioğlu bildirib ki, "Türk Ocaqları” İdarə Heyəti üzvləri, ocağın gənc üzvləri və başqa qonaqların da iştirak etdiyi tədbiri giriş sözü ilə "Türk Ocaqları”nın başqanı Prof. Dr. Mehmet Öz açaraq Türkiyə ilə Azərbaycan arasındakı əlaqələrin keçmişdəki və günümüzdəki durumundan, Qarabağ Zəfərinin önəmindən danışıb, bütün Türk dünyasında böyük söz ustadı kimi tanınan Zəlimxan Yaqubun yaradıcılığından söz açıb, onun əsərlərinin Türk coğrafiyasında yayılmasının vacibliyini vurğulayıb.  

Azərbaycan nümayəndə heyətinin rəhbəri, Milli Məclisin Mədəniyyət Komitəsinin sədri Qǝnirǝ Paşayeva təqdimatda geniş nitq söyləyərək Türk birliyi, Azərbaycanla Türkiyə arasındakı qardaşlıq və Qarabağ müharibəsindən  söz açıb.

Xalq şairi Zǝlimxan Yaqubun Türk dünyasına, o cümlədən qardaş Türkiyəyə sonsuz sevgi-sayğısından, Türkiyənin, Türk dünyasının yüksəlişini, Qarabağda qazanılacaq qələbəni şair fəhmi ilə bütün aydınlığı ilə öncədən görməsindən danışıb: "Zəlimxan Yaqub bütün bu vurğulanan yüksəliş və qələbələrdən öz gözəl əsərlərində bəhs edib, bu mövzularda qiymətli şeirlər, poeamalar yazıb.

Mən Zəlimxan müəllimlə ailə dostu olmuşam. Onun ailədə, cəmiyyətdə, parlamentdə, Türk dünyasında və əlbəttə, şeir-sənət dünyasında necə sayğılı, etibarlı bir yerə sahib olduğunu görmüşəm. Şairin haqqın rəhmətinə qovuşmasından 6 ilə yaxın  vaxt keçsə də, onun dillər əzbəri olan şeirlərinə, ümumən şəxsiyyətinə və yaradıcılığına maraq azalmamışdır. Biz bu il şairin "Qarabağ şikəstəsi” şeirlər və poeamalar kitabını onlayn təqdim edərkən, belə bir fikir hasil oldu ki, onun türk dünyası ünvanlı şeirlərini ayrıca kitab şəklində çap edək. Budur, böyük məmnuniyyətlə bu gün burada "Türkün taleyi” kitabının təqdimatına yığışmışıq.  "Türkün taleyi”nin ilk təqdimatı üçün ən uyğun yerlərdən birinin məhz "Türk Ocaqları” olduğuna inanıram. Necə deyərlər, amal eyni, yol eyni, baxış eyni...

Mən "Türk ocaqları”mızın başqanı, hörmətli Mehmet xocaya, "Türkün taleyi”ni nəşrə hazırlayan Əməkar mədəniyyət işçisi Musa Nəbioğluna, bu təqdimatın hazırlanmasında, kitabın gün üzü görməsində əməyi keçən hər kəsə könül dolusu təşəkkülərimi yetiririəm!

Çox şadam ki, bu təqdimat Türkiyəmizin dünyada nüfuzunun böyük ölçüdə artdığı, Türk Dövlətləri Təşkilatının yarandığı və Vətən Müharibəsində tarixi Zəfərimizin sevinc, fərəh və qüruru içində keçiririk. Bütün bu tarixi uğurlarımızın şairin ruhuna agah olduğuna inanıram. Ruhu şad olsun”!   

Sonra Azərbaycanın TÜRKSOY-dakı təmsilçisi Elçin Qafarlı, "Ozan dünyası" Aşıq Yaradıcılığının Təbliği İB-nin sədri, Əməkdar mədəniyyət işçisi Musa Nǝbioğlu, "Azərbaycanda Qadın Sahibkarlığının İnkişafı Assosiasiyası”nın sədri Səkinə Babayeva, "Dədə Əlǝsgǝr Ocağı" İctimai Birliyinin başçısı Xǝtai Əlǝsgǝrli və digərləri çıxış edrək Zəlimxan Yaqub yaradıcılığından söz açıblar.

"Türk Ocaqları” Mərkəz Məsləhət qurumunun üzvü Dr. Lütfü Şahsuvaroğlu öz çıxışında Türk birliyindən və birliyimizin güclənməsində ədəbiyyatın, mədəniyyətin rolundan danışıb, çıxışının sonunda Zəlimxan Yaqubun Türk birliyinə çağırış ruhlu şeirini oxuyub.

Təqdimatda Zǝlimxan Yaqubun şeirlərindən örnəklər oxunub.

Tədbirin sonunda Azərbaycan heyəti adından "Türk Ocaqları”na və tədbir iştirakçılarına Qarabağ motivli xatirə hədiyyələri və Zəlimxan Yaqubun digər kitabları təqdim olunub. Öz növbəsində "Türk Ocaqları” da Azərbaycan nümayəndə heyətinə hədiyyələr bağışlayıb.